Mankini geymiş çexiyalı "Borat"lar Qazaxıstanda həbs olunub

Məşhur komediya personajı Borat-ın geyimi - mankinidə - Qazaxıstan paytaxtı Astana küçələrinə çıxmış altı çex turisti yerli polis tərəfindən həbs edilərək cərimələnib.

Kişilər üçün açıq-saçıq çimərlik kostyumu sayılan mankinidə fotoşəkil çəkdirmək üçün ötən həftə Astana küçələrinə çıxmış çex turistlərinin hərəkəti yerli sosial mediasında geniş müzakirə olunub.

Çərşənbə axşamı yerli KİV-lər xəbər verib ki, turistlər həbs oldunduqdan sonra "nalayiq" geyim və görünüşə görə polis onların hər birini 22,500 tengə ($67) məbləğində cərimələyib.

Mankini geyimini məşhurlaşdıran aktyor Sacha Baron Cohen-in yaratdığı Borat adlı Qazaxıstan televiziyasının aparıcısı obrazı olub.

Bu xəbər Qazaxıstan sosial istifadəçiləri arasında müzakirələrə səbəb olub.

Jurnalist Assem Mirjekeeva Facebook-da yazıb: "Maraqlıdır, görəsən Çexiya rəsmiləri, onların ölkəsində bizim vətəndaşların eyni hərəkətinə necə reaksiya verərdilər?"

"Məncə, onlar reaksiya verməzdi", - Facebook istifadəçisi Vitaliy Shuptar fikir söyləyib.

"Bu, sataşmaqdır, onlar tutulmalıdır", - @_solar__eclipse_ adlı istifadəçi İnstagram səhifəsində bildirib.

"Milləti təhqir etdiklərinə görə onlara cinayət işi açılmalıdır", - daha bir istifadəçi yazıb.

Borat obrazına Qazaxıstanda münasibət birmənalı deyil.

2006-cı ildə çəkdiyi " "Şanlı Qazaxıstan Xalqının Mənfəəti Naminə Amerika Mədəniyyətinin Öyrənilməsi" adlı filmində Baron Cohen ssenariyə görə, ABŞ-a sənədli film çəkməyə yollanan Qazax televiziyasının aparıcısı Borat Sagdiyevin obrazını yaradıb.

Qazaxıstan Borat filmi və onun DVD-lərinin satışına qadağa qoyub.

Hökümət eləcə də Baron Cohen-i məhkəmə ilə hədələyib.

Film, əsasən, Rumıniyada çəkilsə də, Qazaxıstan rəsmiləri, bu filmin ölkəni irqçi, seksist və geridə qalmış biri kimi təsvir etdiyindən narazılığını bildirib.

Lakin 2012-ci ildə Qazaxıstan Xarici İşlər naziri, ölkəyə gələn turistlərin sayının artmasına səbəbkar olduğuna görə Sacha Baron Cohen-ə təşəkkürünü bildirmişdi.

Ötən il Peruda bir britaniyalı və bir fransız vətəndaşı turistlər arasında populyar sayılan Machu Pichu-da çılpaq şəkil çəkdirdikləri üçün polis tərəfindən dindirilmişdi.

2015-ci ildə britaniyalı turist Malayziyada çılpaq şəkil çəkdirib və buna görə həbs olunub.

2005-ci ildə 17 britaniyalı kişi Yunanıstanın Krit adasında rahibə paltarı geydiklərinə görə həbs olunmuşdular.