Fransa prezidenti Saad Haririni ölkəsinə "səfərə" dəvət edib
Şəklin mənbəyi, AFP
Fransa prezidenti Emmanuel Macron Livanın Baş naziri Saad Haririni və onun ailəsini Fransaya dəvət edib, lakin bildirib ki, bu, siyasi sığınacaq təklifi deyil.
Fransa rəsmiləri deyib ki, Hariri "yaxın günlərdə" ölkəyə gələcək.
Almaniyaya səfərə yola çıxan prezident Macron deyib ki, Fransaya "bir neçə günlük səfərə" Haririni o, onunla və Səudiyyə Ərəbistanın vəliəhd şahzadəsi Məhəmməd bin Salmanla telefon danışığından sonra dəvət edib.
Bu, Saad Haririyə siyasi sığınacaq təklifi deməkdimi, sualına Macron-un cavabı belə olub: "Əsla yox. Mən ümid edirəm ki, Livanda sabitlik olacaq və siyasi seçimlər institusional qaydalara uyğun olmalıdır".
"Bizə güclü, ərazi bütövlüyünə hörmət edilən Livan lazımdır. Bizim seçim etməkdə azad olan və azad şəkildə danışa bilən liderlərə ehtiyacımız var".
Həmçinin oxuyun:
Bu arada Fransanın Xarici İşlər naziri Jean-Yves le Drian böhranı müzakirə etmək üçün Səudiyyə Ərəbistanına gəlib.
Livanın Baş naziri Saad Hariri Ər-Riyada noyabrın 4-də səfəri zamanı gözlənilmədən vəzifəsindən istefa verdiyini elan edib.
Səudiyyə höküməti regional rəqibi olan İranın təsirini məhdudlşadırmaq niyyətilə, Haririnin, iradəsinə zidd olaraq, saxlandığını və ya istefa verməyə məcbur edilməsini inkar edib.
Şəklin mənbəyi, AFP
Çərşənbə günü Livan prezidenti Mişel Aun ilk dəfə olaraq açıq şəkildə Səudiyyə Ərəbistanını Livanın Baş nazirini saxlamaqda ittiham edib.
Aun bildirib ki, Saad Haririnin davamlı yoxluğunu "heç cür əsaslandırmaq" mümkün deyil, və bu, insan haqlarının pozuntusudur.
O, əlavə edib ki, bunu, Livana qarşı "təcavüz aktı" hesab edir.
Öz növbəsində, Saad Hariri bir daha Twitter-də bildirib ki, o, qaydasındadır və tezliklə Livana dönəcək.
Bazar günü axşam verdiyi televiziya müsahibəsində Hariri deyib ki, Səudiyyə Ərəbistanını istədiyi an tərk edə bilər, Livanı isə özünü qorumaq üçün tərk edib.
Haririnin Livanda keçən il formalaşdırdığı birlik hökümətinə islamçı Hizbullah hərəkatı da daxildir.
"Baş nazir Haririnin 12 gün ərzində qayıtmamasını heç cür əsaslandırmaq olmaz. Bu səbəbdən, biz hesab edirk ki, Vyana Konvensiyası və insan haqlarına zidd olaraq o, saxlanılıb", - prezident Aunun rəsmi Twitter hesabında onun dedikləri iqtibas edilib.
Şəklin mənbəyi, EPA
"Xaricdən elan edilən istefa ilə bağlı heç bir qərar verilə bilməz, - Aun əlavə edib. - İstefasını təqdim etmək üçün o, Livana dönüb istefasını təqdim etməli, və ya qərarını geri götürməli, və ya qərarının səbələri və onların çözümü yollarını müzakirə etməlidir".
"Biz gözləməkdə davam edib vaxt itirə bilmərik. Dövlət işləri daydandırıla bilməz", - Aun vurğulayıb.
Maronit xristianı olan Mişel Aun keçmiş ordu rəhbəridir, o, islamçı silahlılar və Hizbullah siyası partisı ilə müttəfiqdir.
Mişel Aun şərhini jünalistlərlə görüşdə edib.
"Bu, Livanın ləyaqətilə bağlı məsələdir, - o, Livan mediasına əsasən, deyib. - Hariri və onun ailəsinin azadlığı məhdudlaşdırılıb, o, nəzarət altındadır".
Saad Hariri prezidentin şərinə dərhal Twitter vasitəsilə cavab verib: "Təkrar etmək istəyirəm və təsdiqləyirəm ki, mən özümü əla hiss edirəm, və Allah qoysa, əziz Livana, söz verdiyim kimi, qayıdacağam".
Şəklin mənbəyi, Reuters
Beyrutda BBC müxbiri Martin Patience-in sözlərinə görə, Mişel Aun, sadəcə, Livan rəsmilərinin öz aralarında söhbətlərdə dediklərini səsləndirib.
Hariri Iranı regionda ixtilaf, viranəlik və dağıntı yaratmaqda ittiham edib və deyib ki, ona qarşı suiqəsdin hazırlandığını hiss edib.
Onun atası Rafik də Livanın keçmiş Baş naziri olub.
Rafik Hariri 2005-ci ildə Beyrutda intiharçının törətdiyi partlayış nəticəsində həlak olmuşdu.
BMT-nin dəstəklədiyi Haaqa tribunalında bu hücumla bağlı Hizbullah-ın bir neçə üzvünün qiyabı məhkəməsi davam etməkdədir, lakin Hizbullah-ın özü bu işdə iştirakını inkar edir.
Səudiyyə vətəndaşlığı olan Haririnin Səudiyyə ilə sıx əlaqələri var. Səudiyyə Ərəbistanı onun başçılıq etdiyi patiyanı dəstəkləyir.
