Keniya: avtobusa hücum edənlər azı 28 adamı öldürüb
Şəklin mənbəyi, AP
Güman edildiyinə görə Somali döyüşçü qrupu əl-Şəbab üzvləri Keniyanın şimalında avtobusa hücum edərək ən azı 28 nəfəri öldürüb, rəsmilər deyir.
Paytaxt Nayrobiyə gedən avtobus Somali sərhədi yaxınlığında, Manderada dayandırılmışdı.
Silahlılar qeyri-müsəlman kimi qəbul etdikləri adamları ayırıb onları öldürüblər, rəsmilər və şahidlər deyib.
2011-ci ildən Keniyada hücumlar həyata keçirən Əl-Şəbab qrupu deyib ki, hücumu o həyata keçirib.
İslamçı qrupa bağlı vebsaytdakı bəyanatda deyilir ki, hücumlar bu həftə Mombasa şəhərindəki məscidlərdə həyata keçirilən <link type="page"><caption> reydlərə</caption><url href="http://www.bbc.co.uk/azeri/multimedia/2014/11/141118_kenya_mombasa.shtml" platform="highweb"/></link> cavabdır.
Sərnişinlərdən biri Ahmed Mahat BBC-ə bildirib ki, hücum baş verəndə avtobusda 60-dan çox adam var idi.
Sürücü avtobusun sürətini artırıb hücumçulardan uzaqlaşmağa cəhd etsə də, güclü yağışlar nəticəsində yaradılan palçıqda ilişib, sərnişin deyib.
10-a yaxın silahlı kişi somali dilində danışaraq sərnişinlərə avtobusdan çıxmağa göstəriş verib.
"Biz çıxanda sərnişinlər somalili və qeyri-somalili kateqoriyalarına bölündü", cənab Mahat deyib.
"Qeyri-somalililərə müqəddəs Qurandan ayələr oxutdurdular, onları oxuya bilməyənlərə isə uzanmaq göstərişi verildi. Bir-bir onlara yaxınlaşaraq başlarına güllə vurdular".
Keniyanın Qırmızı Xaç təşkilatı deyib ki, işçilər cəsədləri hadisə yerindən bərpa etməyə çalışır.
