Moskva Vaşinqtonu Suriyada hökümət hədəflərini bombalamaqdan ehtiyatlandırıb
Şəklin mənbəyi, Reuters
Rusiya Xarici İşlər naziri Sergey Lavrov ABŞ Dövlət Katibi John Kerry-yə Suriyada hökümət hədəflərini bombalamamaq barədə xəbərdarlıq edib.
Rusiya XİN rəhbəri bunu Rusiya televiziyasına müsahibəsində bildirib.
"Mən ABŞ həmkarlarıma açıq şəkildə bildirdim ki, onlar səhvə yol verib Suriyada hökümət hədəflərinə zərbə endirsələr, bu, ölkədəki vəziyyəti alt-üst edəcək, nəticədə orada vəziyyət nəzarətdən çıxacaq", Lavrov deyib.
Sergey Lavrov xatırladıb kı, Əfqanıstanda Taliban və Əl-Qaidəyə qarşı ABŞ dronlardan istifadə edir, lakin bir çox hallarda həmin zərbələrin hədəfinə dinc əhali, o cümlədən, uşaqlar və qadınlar düşür.
Rusiya XİN başçısının sözlərinə görə, ABŞ Suriya rəhbərliyinə münasibətdə ikili standartdan istifadə edir.
"Kimyəvi silahın məhv edilməsində Bəşər Əsəd legitim partnyor sayıldığı halda, terrorçuluğa qarşı mübarizədə ABŞ Əsəd ilə əməkdaşlığı qəbul etmir", Sergey Lavrov qeyd edib.
