Mullany: Dim dedfryd tan 2012?

Mae'n bosib y bydd yn rhaid i deuluoedd Ben a Catherine Mullany aros tan y Flwyddyn Newydd er mwyn gwybod ffawd y ddau ddyn oedd yn euog o lofruddio'r par o Gwm Tawe.

Cafodd y ddau eu lladd ar ddiwrnod olaf eu mis mêl yn Antigua ar Orffennaf 27 2008.

Cafwyd Kaniel Martin, 23, a Avie Howell, 20, yn euog o lofruddio yng Ngorffennaf.

Roedd teuluoedd Mr a Mrs Mullany wedi gobeithio y byddai'r ddau yn cael eu dedfrydu heddiw, ar ôl i adroddiadau seiciatrig gael eu cyflwyno i Uchel Lys Antigua heddiw.

Yn wreiddiol roedd disgwyl i'r adroddiadau gael eu cyflwyno fis diwethaf, ond fe gafodd bar gyfreithiwr Martin ei daro'n sâl.

Ddydd Gwener clywodd y llys fod amddiffyniad Martin a Howell yn herio rhai o gasgliadau'r adroddiad.

Roeddynt am i'r llys glywed eu rhesymau'r wythnos nesa.

Dywedodd y barnwr Richard Floyd ei fod angen ystyried yr hol beth yn ddwys.

Awgrymodd ei bod yn bosib na fyddai'r dedfrydu yn digwydd cyn diwedd 2011.

Gall Martin wynebu'r gosb eithaf ond roedd Howell yn rhy ifanc pan gafodd Mr a Mrs Mullany eu lladd i wynebu'r gosb eithaf.

Adroddiadau seiciatryddol

Heddiw oedd y pumed tro iddyn nhw ymddangos yn y llys ers iddyn nhw eu cael yn euog.

Cafodd y dedfrydu ei ohirio ym mis Hydref tra bod adroddiadau seiciatryddol yn cael eu cwblhau.

Roedd Ben a Catherine Mullany, y ddau yn 31 oed, yn dod o Bontardawe.

Cafodd Mr a Mrs Mullany eu saethu mewn bwthyn ar ynys Antigua bythefnos ar ôl iddyn nhw briodi.

Wythnosau yn unig ar ôl y briodas yn Eglwys Cilybebyll ger Pontardawe fe gafodd y ddau eu claddu ym mynwent yr eglwys.

Cafwyd Martin a Howell yn euog hefyd o lofruddio Woneta Anderson, siopwraig ar yr ynys, o dan amgylchiadau tebyg iawn.

Ar ddiwedd yr achos llys ym mis Gorffennaf dywedodd yr erlynyddion y byddan nhw'n "neilltuo dyfarniad" a fyddan nhw'n galw am y gosb eithaf.

Ond dydi'r gosb eithaf ddim wedi ei weithredu ar yr ynys ers y 1990au.

Wedi ymyrraeth gan y Cyfrin Gyngor yn Llundain yn 2000 mae'n rhaid i bob cosb eithaf yn Antigua gael eu gweithredu o fewn pum mlynedd o'r euogfarn.

Ym mis Tachwedd clywodd cwest yn Abertawe fod Mr a Mrs Mullany wedi eu gorfodi i benlinio wrth ymyl eu gwely yng ngwesty Cocos cyn iddyn nhw gael eu saethu yn eu pennau.

Cofnododd y cwest reithfarn o ladd anghyfreithlon ar y ddau.

Clywodd y cwest for trigolion eraill y gwesty wedi clywed sgrechfeydd a sŵn saethu am 5am.

Galwyd yr heddlu, ac fe ddaethon nhw o hyd i Catherine Mullany yn farw, a'i gŵr Ben wedi ei anafu'n ddifrifol.

Cafodd ei gludo adre' i Gymru ond bu farw yn fuan ar ôl cyrraedd.