Caerdydd yn dychwelyd i Wembley

Fe fydd Caerdydd yn teithio i'r Wembley newydd am y pedwerydd tro mewn pum mlynedd wedi iddyn ennill yn rownd gynderfynol Cwpan Carling ar giciau o'r smotyn.

Roedd tîm y brifddinas un ar ei hôl hi wedi cymal cyntaf y rownd gynderfynol yn erbyn Crystal Palace cyn eu croesawu i Stadiwm Dinas Caerdydd nos Fawrth.

Anthony Gardner oedd wedi sgorio gôl Palace yn y cymal cyntaf, ond yntau hefyd rwydodd i'w gôl ei hun wedi llai na saith munud i unioni'r sgôr dros y ddau gymal.

Fe allai Caerdydd fod wedi bod ddwy neu dair ar y blaen cyn yr egwyl.

Daeth dau gyfle i'r prif sgoriwr Kenny Miller, ond dim llwyddiant er i un gynnig wedi 40 munud basio fodfeddi heibio'r postyn.

Yn yr ail gyfnod roedd mwy o bwrpas i chwarae'r ymwelwyr, ond roedd hynny'n rhoi cyfleoedd i Gaerdydd wrthymosod, a bu ond y dim i Peter Whittingham sgorio gydag ergyd o 25 llath.

Roedd Palace yn cryfhau wrth i'r gêm fynd yn ei blaen, ac fe ddaeth un cyfle da i Wilfrid Zaha, ond methodd y chwaraewr ifanc a manteisio.

Gyda llai na chwarter awr yn weddill o'r 90, fe welodd Benny McCarthy gerdyn coch i Palace, gan godi gobeithion Caerdydd.

Ond roedd angen gôl arall, ac er i Don Cowie fynd yn agos doedd dim yn tycio a bu'n rhaid chwarae hanner awr o amser ychwanegol.

Er fod Palace i lawr i ddeg dyn, dyw hynny ddim yn anfantais wrth fynd i giciau o'r smotyn, ac fe daflodd Malky Mackay Rudy Gestede ar y cae fel eilydd mewn ymdrech i osgoi'r artaith hwnnw.

Roedd Miller wedi taro'r postyn a Kiss wedi taro'r trawst cyn i Aron Gunarsson daro'r trawst eto ym munud ola'r chwarae ond doedd dim mwy o sgorio.

Roedd Wrecsam wedi diodde' gyda chiciau o'r smotyn wythnos yn ôl, ac roedd ergyd debyg i Gaerdydd.

Kenny Miller - o bawb - fethodd y gic gyntaf o'r smotyn, ond methodd Palace eu cic gyntaf nhw wrth i Tom Heaton arbed cynnig Jermaine Easter, hogyn o Gaerdydd!

Roedd Heaton yn arwr eto wrth arbed ail gynnig yr ymwelwyr - Caerdydd ar y blaen.

Llwyddodd Conway, Whittingham a Gestede gyda'u cynigion nhw, a phan arbedodd Heaton drydydd cynnig gan Palace, roedd Caerdydd eisoes yn dathlu cyrraedd Wembley.