Dyn wedi'i arestio wedi gwrthdrawiad

Mae dyn 44 oed wedi cael ei arestio a'i ryddhau ar fechnïaeth yn dilyn gwrthdrawiad achosodd farwolaeth beiciwr.

Cafodd Alan Mort, 63 oed o Fae Cinmel, Conwy, anafiadau difrifol i'w ben a bu farw yn yr ysbyty wedi'r digwyddiad ar yr A458 ger Ystad Diwydiannol Manor, Fflint.

Fe ddigwyddodd tua 12:38pm ddydd Sul a chafodd y ffordd ei chau i'r ddau gyfeiriad.

Mae'r heddlu yn apelio am dystion, yn enwedig unrhyw un a welodd y beiciwr neu Range Rover arian yn y cyffiniau.

Yn ôl swyddogion, gyrrwr y cerbyd oedd y dyn a gafodd ei arestio.

Dylai unrhyw un â gwybodaeth ffonio Heddlu Gogledd Cymru ar 101.