Gatland i arwain y Llewod?

Mae BBC Cymru ar ddeall bod Warren Gatland wedi cael cynnig y swydd o hyfforddi'r Llewod yn 2013.

Cafodd Gatland - hyfforddwr Cymru - gyfweliad am y swydd yn Llundain ddydd Mercher cyn dychwelyd i'w gartref yn Seland Newydd

Credir bod cynrychiolwyr Gatland bellach wedi dechrau trafodaethau cytundebol, ac mae disgwyl cadarnhau'r penodiad fis nesaf.

Mae penaethiaid y Llewod am i hyfforddwr 2013 fod ar gael am flwyddyn i bob pwrpas.

Eisoes mae Undeb Rygbi Cymru wedi agor y drws i'r penodiad drwy ganiatáu i Gatland fethu Pencampwriaeth y Chwe Gwlad yn 2013.

Mae prif weithredwr yr Undeb, Roger Lewis, wedi sgwrsio'n anffurfiol gyda rheolwr y Llewod, Andy Irvine, a'r prif weithredwr John Feehan, er mwyn i Gatland fedru arwain y daith i Awstralia.

Roedd Gatland yn ddirprwy i Sir Ian McGeechan ar y daith i Dde Affrica yn 2009.

Mae disgwyl i Gatland benodi hyfforddwr amddiffyn Cymru, Shaun Edwards, fel ei ddirprwy, gan adael Rob Howley a Robin McBryde yng ngofal Cymru ar gyfer y daith i Japan yn haf 2013.

Gatland fyddai'r ail hyfforddwr o'r tu allan i Brydain i arwain y Llewod wedi i Graham Henry - oedd hefyd yn hyfforddwr Cymru - arwain y daith i Awstralia yn 2001.