Galw am fforwm annibynnol i astudio'r diwydiant creadigol

Mae angen fforwm annibynnol i astudio'r diwydiannau creadigol yng Nghymru - dyna gasgliad adroddiad trawsbleidiol.

Mae'r fforwm i edrych ar gwmnïau teledu, papurau newydd a sectorau eraill o'r cyfryngau.

Arweinydd y drafodaeth ar ddyfodol y cyfryngau yng Nghymru a Chadeirydd y Grŵp oedd Ken Skates AC.

Dywedodd Mr Skates bod y grŵp wedi clywed tystiolaeth "nad oedd Llywodraeth Cymru yn rhan" o'r diwydiant creadigol yng Nghymru.

Argymhelliad y grŵp oedd y dylai'r llywodraeth sefydlu fforwm annibynnol i gynghori ar bolisi mewn perthynas â'r cyfryngau yng Nghymru.

Cafodd yr argymhelliad yma ei wrthod gan y llywodraeth - ond fe wnaeth dderbyn yr alwad am adolygu'r ddarpariaeth wleidyddol oedd yn cael ei wneud gan BBC Cymru, yn benodol ar sail toriadau cyllideb i'r adran berthnasol.

Fe wnaeth hefyd dderbyn yr argymhellion i gadw golwg y cytundebau ar gyllid S4C i sicrhau bod y cytundeb ariannol yn addas.

Roedd Mike Hedges AC yn nodi'r angen i barhau gyda chyllid digonol ar gyfer y sianel er mwyn darlledu rhaglenni o ansawdd, rhaglenni fel Cyw a darllediadau o Uwch Gynghrair Cymru.

Wrth ymateb i'r adroddiad, dywedodd y Gweinidog Treftadaeth Huw Lewis, y dylai rôl y Cynulliad a Llywodraeth Cymru "ddatblygu a thyfu yn nhermau'r berthynas gyda'r cyfryngau".

Er hynny, fe wnaeth y gweinidog godi pryderon mewn perthynas â'r diwydiant papurau newydd.

"Er nad oes gennym ni (Llywodraeth Cymru) gyfrifoldeb uniongyrchol am y diwydiant papur newydd yng Nghymru, rydym yn hynod bryderus am i nifer o swyddi sy'n cael eu colli."

Pwysleisiodd bod y diwydiant cyfryngau fel cyfanwaith "yn wynebu dyfodol ansicr".

Ond fe wnaeth ganfod y bartneriaeth newydd rhwng S4c a BBC gan ddwued "bod budd i bobl Cymru".

Fe wnaeth o hefyd dalu teyrnged i ITV Cymru gan bwysleisio'r pwysigrwydd am "lais annibynnol cryf" i wrthbwyso yn erbyn BBC Cymru.