Swyddi newydd yn Admiral

Mae 236 o swyddi newydd yn mynd i gael eu creu yng Nghymru gyda'r cwmni Admiral.

Mae hyn yn golygu bod dros 5,000 o bobl Cymru erbyn hyn yn gweithio i'r cwmni yswiriant am y tro cyntaf erioed.

Mae 108 o swyddi wedi eu creu yn Abertawe, 88 yng Nghaerdydd a 40 yng Nghasnewydd a byddan nhw'n cael eu llenwi yn ystod y tri mis nesaf.

Dyw'r cwmni ddim wedi cynnig cynifer a hyn o swyddi ers rhyw 18 mis.

Ym mis Mawrth fe gyhoeddodd Admiral sydd hefyd yn berchen brandiau megis Confused.com, Elephant.co.uk a Diamond bod cynnydd o 15% wedi bod yn eu helw.

Wrth gyhoeddi'r swyddi newydd dywedodd pennaeth gwasanaethau pobl Admiral, Ceri Assiratti:

"Mae'n wych i weld y busnes yn parhau i ddatblygu.

"Rydyn ni yn recriwtio yn benodol ar gyfer ein swyddfeydd yn ne Cymru ac yn edrych am bobl gyda'r sgiliau gorau i'n helpu ni i roi gwasanaeth gwych i'n cwsmeriaid.

"Rydyn ni wedi cael nifer o flynyddoedd llwyddiannus yma yng Nghymru ac rydyn ni wrth ein boddau ein bod ni yn parhau i dyfu fel cwmni."

Admiral yw'r ail gwmni yswiriant car mwyaf ym Mhrydain a'r flwyddyn nesaf mae disgwyl iddynt symud i bencadlys newydd yng nghanol dinas Caerdydd.

Mae ganddyn nhw hefyd gynlluniau i symud i swyddfeydd newydd yng Nghasnewydd.