Tanau gwair yn ne Cymru wedi tywydd sych

Mae criwiau tân wedi bod yn ceisio diffodd cyfres o danau gwair yn ne Cymru dros nos.

Roedd tân mawr yng Nglyncorrwg, ger Port Talbot, yn dal i losgi fore dydd Sadwrn.

Yn ôl Gwasanaeth Tân ac Achub Canolbarth a Gorllewin Cymru, fe gawson nhw eu galw toc cyn 1:00am.

Roedd 20 o ddiffoddwyr a phedair injan dân yno yn ceisio cael y fflamau dan reolaeth.

Yn ogystal, mae criwiau tân y de wedi bod yn ceisio diffodd tanau yn y Cymer, Porth, Bedlinog, ynghyd â mynyddoedd Rhigos a Maerdy.

Dyw hi ddim yn ymddangos fod unrhyw un wedi'u hanafu yn y digwyddiadau.

Yn y cyfamser, cafodd criwiau eu galw'n ôl i dân eithin yn Y Bermo yng Ngwynedd. Roedd 'na dân ar y safle tair hectar ddydd Gwener hefyd.

Mae 'na dair injan dân ar y safle ers i'r awdurdodau dderbyn galwad am 8:34am ddydd Sadwrn.