Morgannwg ar drothwy buddugoliaeth

Mae cricedwyr Morgannwg wedi cael bore ardderchog arall ar drydydd diwrnod eu gêm ym Mhencampwriaeth y Siroedd yn erbyn Caint ddydd Gwener.

Pan ddaeth batiad cyntaf Morgannwg i ben ar 378 ddydd Iau, fe gafodd y bowlwyr gyfnod da cyn diwedd y diwrnod i adael Caint ar 73 am 4 wiced.

Dal i syrthio oedd y wicedi fore Gwener gyda phum bowliwr yn cyfrannu. Daeth wicedi i Hogan (3), dwy yr un i Wagg, Reed ac Allenby ac un i Dean Cosker a chyn cinio roedd Caint i gyd allan am 135.

Roedd y cyfanswm yna un yn llai nag y cafodd Murray Goodwin ar ben ei hun i Forgannwg.

Gyda Morgannwg dros 150 ar y blaen - 243 i fod yn fanwl - roedd ganddyn nhw'r hawl i ofyn i Gaint fatio eto yn syth ac fe wnaethon nhw hynny.

Dim ond pelawd o'r ail fatiad gafwyd cyn cinio, ond doedd dim sgor na wiced.

Sgôr diweddaraf (amser cinio'r trydydd diwrnod)

Morgannwg (batiad cyntaf)= 378

Caint (batiad cyntaf) = 135

Caint (ail fatiad) = 0 am 0 wiced (1 belawd)