Gatland yw Hyfforddwr y Flwyddyn

Mae hyfforddwr rygbi Cymru a'r Llewod, Warren Gatland, wedi cael ei ddewis fel Hyfforddwr y Flwyddyn y DU.

Fe ddaeth i'r brig yng nghategori'r hyfforddwr perfformiad uwch hefyd yng ngwobrau UK Coaching 2013.

Gyda chyfres y Llewod yn gyfartal ar 1-1 wedi'r ddwy gêm gynta', sicrhaodd tîm Gatland fuddugoliaeth gofiadwy yn erbyn y Wallabies yn Sydney o 41 pwynt i 16.

Derbyniodd y wobr mewn seremoni arbennig yn Llundain nos Fawrth.

Mewn cyfweliad â'r BBC, dywedodd Gatland y byddai'n ystyried hyfforddi'r Llewod eto petai cyfle'n dod.

"Roedd yn brofiad anhygoel i fod yn rhan o'r holl beth," meddai. "Mae'n siŵr byddai mynd i Seland Newydd, i mi, yn gyfle gwych yn 2017 ond mae 'na lawer o bethau i ddigwydd cyn hynny.

"Mi fydda' i'n canolbwyntio dros y blynyddoedd nesa' ar wneud yn dda dros Gymru ac os yw Cymru'n gwneud yn dda yn y Chwe Gwlad ac yng Nghwpan y Byd yna rydych chi'n tynnu sylw at eich hun a gobeithio bydd cynnig yn dod eto.

"'Dy'ch chi byth yn gwybod a petawn i'n cael cynnig i'w wneud eto, yn enwedig yn fy ngwlad enedigol, yna rwy'n credu y byddai'n rhywbeth bydden i'n fwynhau'n arw."