Dyn yn euog o achosi marwolaeth mam a'i babi yn y groth

Mae gyrrwr wedi ei ganfod yn euog o achosi marwolaeth dynes feichiog mewn damwain ffordd yng ngogledd Cymru.

Clywodd y llys bod Calvin Connah, 22, o Goed-llai ger yr Wyddgrug, yn gyrru ar gyflymder o 85mya cyn i'w gar daro yn erbyn un Christina Barchetti ar yr A541 ym Mhontblyddyn ym mis Hydref 2012.

Bu farw Ms Barchetti a'i babi yn y groth, Bella Clarke, yn ddiweddarach yn Ysbyty Maelor Wrecsam.

Roedd Connah wedi gwadu achosi marwolaeth drwy yrru'n beryglus.

Clywodd y llys bod Connah wedi bod yn gyrru BMW ei dad ac yn ceisio pasio car arall cyn diwedd darn o ffordd ddeuol.

Ond roedd rhaid iddo frecio yn galed wrth i'r ffordd newid i un lon.

Collodd reolaeth o'r cerbyd ac aeth yn syth i mewn i Ford Ka Ms Barchetti.

Clywodd y llys ei bod hi wedi bod yn gyrru ar 40mya, a bod y gwrthdrawiad wedi ei gwthio yn ôl drwy wal ac i mewn i goedwig.

Yn ystod yr achos, dywedodd Connah ei fod wedi bod yn gyrru ar 60mya, a'i fod wedi colli rheolaeth oherwydd y tywydd gwlyb.

Dywedodd ei fod wedi gwneud camgymeriad.

Ond yn ôl tystion, roedd y diffynnydd wedi bod yn gyrru yn rhy gyflym, a dywedodd yr ymchwilydd i'r achos ei fod yn debyg iddo fod yn teithio ar 85mya cyn y gwrthdrawiad.

Cafodd Connah ei gadw yn y ddalfa cyn cael ei ddedfrydu.

Dywedodd y barnwr Philip Hughes y dylai ddisgwyl cyfnod yn y carchar.

Roedd Connah wedi cyfaddef achosi marwolaeth drwy yrru heb ofal, ond gwadodd y cyhuddiad mwy difrifol.