Richard ac Adam i ganu mewn cyngerdd at apêl llifogydd

Mi fydd y cantorion opera Richard ac Adam a ddaeth yn enwog wedi iddynt ymddangos ar raglen "Britain's Got Talent" eleni yn canu mewn cyngerdd.

Mi fydd y brodyr a ganodd "Impossible Dream" ar y rhaglen yn perfformio gyda nifer o artistiaid eraill gan gynnwys Katie Benbow oedd ar sioe BBC "The Voice".

Pwrpas y Cyngerdd ydi codi arian ar gyfer y rhai sydd wedi dioddef wedi i lifogydd daro rhannau o'r Rhyl ar ddechrau mis Rhagfyr.

Meddai Adam: "Roedd yn drist iawn i weld be ddigwyddodd ar y newyddion. Ond y straeon personol sydd yn dangos effaith go iawn y trychineb ac fe wnaeth hyn i ni deimlo bod rhai i ni wneud rhywbeth i helpu."

Ychwanegodd Maer Y Rhyl, y Cynghorydd Andy Rutherford :" Dwi'n annog pobl i ddod i'r sioe a phrynu ticedi er mwyn cyfrannu tuag at yr achos."

Mi fydd y cyngerdd yn cael ei gynnal yn Neuadd Tref Y Rhyl ac yn dechrau am 7yh nos Sadwrn.

Mae tocynnau yn costio £10 ac ar gael o Ganolfan Gwybodaeth Twristiaeth Y Rhyl.