Dyn yn pledio'n euog i gynnau tân yn fwriadol

Mae dyn wedi pledio yn euog i gynnau tân yn fwriadol mewn ffatri greision.

Cyfaddefodd Colin Goulding iddo gynnau'r tân yn ffatri Real Crisps yng Nghrymlyn ym mis Medi 2012.

Roedd Goulding yn gweithio yn y ffatri.

Bydd yn cael ei ddedfrydu ddydd Mercher, Ionawr 8, yn Llys y Goron Casnewydd.

Cafodd y gwasanaethau brys eu galw yn oriau mân bore Iau Medi 20, 2012.

Roedd 115 o bobl yn gweithio yn y ffatri a chafodd dros 75% o'r adeilad ei ddifrodi.

Oherwydd hynny, dywedodd y cwmni oedd berchen y ffatri, Tayto Group o Ogledd Iwerddon, y byddai'n rhaid diswyddo staff.

Cafodd 80 eu diswyddo ym mis Hydref 2012, a 10 arall erbyn diwedd y flwyddyn.

Cafodd gweithwyr eraill eu hadleoli i safleoedd gwahanol.