Buddugoliaeth ysgubol i Forgannwg

Mae Morgannwg wedi trechu Caint - o fatiad ac 11 rhediad - yn eu gêm yn ail adran Pencampwriaeth y Siroedd.

Roedd hi'n fuddugoliaeth glir i Forgannwg wrth i'r ymwelwyr yn Stadiwm Swalec gael eu bowlio allan am 263.

Michael Hogan wnaeth sicrhau'r fuddugoliaeth.

Ar ôl cymryd 5 am 58 yn y batiad cyntaf fe gipiodd Hogan 5 am 67 yn yr ail fatiad.

Roedd gan Forgannwg reolaeth gadarn o'r gêm ar ôl sgorio 527 - ac roedd bowlio Hogan yn ddigon i drechu'r gwrthwynebwr.

Bydd y fuddugoliaeth yn hwb pellach i hyder Morgannwg ar ôl dechrau da i'r tymor.

Mae'r canlyniad yn golygu eu bod wedi codi i'r pedwerydd safle yn yr ail adran.

Morgannwg (24 Pwynt)

Batiad Cyntaf: 527 i gyd allan

Caint (3 phwynt)

Batiad Cyntaf: 253 i gyd allan

Ail Fatiad: 263 i gyd allan

Morgannwg yn fuddugol o fatiad ac 11 rhediad.