Tri o fabanod yn gadael uned heintiedig yng Nghaerdydd

Mae tri o'r 12 o fabanod gafodd eu heintio mewn uned gofal dwys i fabanod yng Nghaerdydd wedi cael mynd adref.

Ers dydd Iau diwetha', mae'r ward yn Ysbyty Athrofaol Cymru wedi atal mynediad i fabanod newydd oherwydd "clwstwr o heintiau".

Dywedodd Bwrdd Iechyd Prifysgol Caerdydd a'r Fro bod y babanod a gafodd eu heintio wedi "ymateb yn dda i driniaeth".

Mae 13 o fabanod nawr yn yr uned, ac mae babanod eraill sydd angen gofal yn cael eu cyfeirio at ysbytai eraill.

Dywedodd cyfarwyddwr nyrsio'r bwrdd iechyd, Ruth Walker: "Byddwn yn parhau i weithio i gadw'r babanod yn ddiogel a chynnal ein cefnogaeth i famau beichiog."

Ychwanegodd y bwrdd iechyd bod mesurau wedi'u cyflwyno i atal yr heintiau - Acinetobacter baumanii ac Enterobacter - rhag lledu.

Er nad yw'n anghyffredin i fabanod gael heintiau, mae'r nifer yma o achosion, mor agos at ei gilydd yn "anarferol", meddai'r bwrdd iechyd.

Mae'r uned yn parhau i ddelio gydag achosion brys pan fo'r angen.