Milwr wedi marw o 'achosion naturiol' ym mis Gorffennaf

Mae teulu milwr fu farw ar ymarferiad yn Aberhonddu wedi cael clywed ei fod wedi marw o achosion naturiol.

Bu farw'r Cpl Joshua Hoole, 26 oed o Lockerbie yn Yr Alban, ar gwrs hyfforddi ym mis Gorffennaf eleni.

Roedd Cpl Hoole wedi gorffen taith wyth milltir pan lewygodd yng nghanolfan hyfforddi Dering Lines. Roedd yn aelod o gatrawd y reifflau yng nghanolfan hyfforddi Catraeth.

Bu farw ar un o'r diwrnodiau poethaf o'r flwyddyn, gyda'r tymheredd yn cyrraedd 30C yn ardal Aberhonddu.

Fe wnaeth Heddlu Dyfed-Powys ymchwilio i'w farwolaeth ar y pryd.

Dywedodd John Craig, taid y milwr wrth BBC Cymru fod y teulu wedi cael clywed gan swyddogion ei fod wedi marw o achosion naturiol.

Yn fuan ar ôl ei farwolaeth, cafodd ei ddisgrifio gan ei fodryb Morag Craig fel dyn "cwbl ffantastig" gyda "chalon o aur".

Mae'r heddlu wedi cyfeirio'r mater i grwner Powys.