Dyn wedi marw mewn gwrthdrawiad yng nghanol Abertawe

Mae dyn 77 oed wedi marw yn dilyn gwrthdrawiad yn Abertawe nos Wener.

Dywedodd Heddlu'r De ei bod hi'n debyg bod y dyn yn croesi ffordd yng nghanol y ddinas pan fu mewn gwrthdrawiad gyda char Peugeot glas tua 22:30.

Cafodd y dyn ei gludo i Ysbyty Treforys, ond bu farw yno.

Mae'r heddlu'n apelio am wybodaeth gan unrhyw un welodd y gwrthdrawiad neu sut oedd y cerbyd yn cael ei yrru cyn y digwyddiad.

Dyn 34 oed oedd yn gyrru'r car, ac mae'n helpu'r heddlu â'u hymholiadau.