Miloedd yn y môr i ddathlu traddodiad dydd Calan

1 Ionawr 2017

New Year's Day swimmers — Disgrifiad o’r llun,
Roedd rhai wedi mynd i hwyl y peth go iawn gyda'u gwisgoedd

Mae miloedd o bobl ddewr ar hyd a lled Cymru wedi bod yn ymdrochi yn y môr fel rhan o draddodiadau blynyddol ar ddydd Calan.

Cafodd digwyddiadau eu cynnal ar draethau yn Llanussyllt yn Sir Benfro, y Barri ym Mro Morgannwg ac Abersoch yng Ngwynedd wrth i'r nofwyr - rhai mewn gwisgoedd ffansi - fentro i'r dyfroedd rhewllyd.

Ond cafodd digwyddiad ym Morfa Nefyn, Gwynedd ei ganslo oherwydd gwyntoedd cryfion.

Swimmers on Saundersfoot beach — Disgrifiad o’r llun,
Fe heidiodd y nofwyr yn eu miloedd i Lanussyllt

Mentrodd dros 1,800 o bobl i'r môr yn Llanussyllt, tra bod tua 500 wedi plymio i'r dŵr yn Abersoch a'r Barri.

Dywedodd cadeirydd criw bad achub Abersoch, Phill Brown fod y digwyddiad wedi ennyn "cefnogaeth dda gan nofwyr a gwylwyr", ac yn ôl trefnydd oefad y Barri roedd hi wedi mynd yn "wych".

Ychwanegodd trefnydd y digwyddiad yn Llanussyllt, Martyn Williams bod y "pentref a'r gymuned ehangach yn falch iawn" o allu cynnal "digwyddiad mor fawr".