Crystal Palace 1-2 Abertawe
- Cyhoeddwyd
Mae Abertawe wedi codi o waelod yr Uwchgynghrair wedi buddugoliaeth ddramatig oddi cartref yn Crystal Palace.
Daeth y gôl allweddol ar ôl 88 munud, pan rwydodd Angel Rangel o ganol y cwrt cosbi.
Funudau ynghynt, roedd Wilfred Zaha wedi unioni'r sgôr gyda gôl wych i Palace - hynny wedi i beniad Alfie Mawson roi'r Elyrch ar y blaen yn yr hanner cyntaf.
Yn gwylio o'r eisteddle yn Selhurst Park roedd Paul Clement, gafodd ei enwi'n brif hyfforddwr yn gynharach ddydd Mawrth.
Prif hyfforddwr newydd yr Elyrch, Paul Clement, yn gwylio'r gêm yn Selhurst Park
Y rheolwr dros dro, Alan Curtis, ddewisodd y tîm yn erbyn Palace, a dechreuodd pethau'n dda, gyda'r Elyrch ar y droed flaen am y rhan fwyaf o'r hanner cyntaf.
Fe fethodd Ki Sung-yueng, Federico Fernandez a Jack Cork gyfleon da, cyn i Mawson sgorio ei gôl gyntaf i'r clwb yn y gynghrair gyda pheniad o gic rydd Gylfi Sigurdsson.
Ond ceisio dal eu mantais oedd eu hanes am y rhan fwyaf o'r ail hanner, a gyda saith munud i fynd fe sgoriodd Wilfred Zaha foli ddisglair i unioni'r sgôr.
Er hynny, daeth yr Elyrch yn ôl, gyda gôl Rangel yn sicrhau buddugoliaeth allweddol i glwb sydd newydd benodi eu trydydd rheolwr mewn tymor.
Gyda'r tri phwynt, mae Abertawe yn codi i'r 19eg safle ar 15 o bwyntiau - un yn llai na Crystal Palace, sy'n 17eg yn y gynghrair.
