Rhagweld dyfodol disglair i Woodburn gyda Chymru

Fe allai Ben Woodburn ddatblygu i fod yn chwaraewr gwerthfawr i Gymru, medd rheolwr y tîm cenedlaethol Chris Coleman.

Fe sgoriodd yr ymosodwr 17 oed o fewn munudau i redeg ar y cae yn ei gêm gyntaf dros ei wlad yn erbyn Awstria nos Sadwrn, gan roi hwb i obeithion Cymru o gyrraedd rowndiau terfynol Cwpan y Byd.

Roedd Coleman yn ofalus rhag ei gymharu a sêr fel Gareth Bale a Ryan Giggs, ond dywedodd: "Dwi'n gwybod fod ei ergyd yn wych, ond roedd ei holl agwedd yn wych hefyd."

"Mae ganddo'r holl nodweddion i fod yn chwaraewr mawr," ychwanegodd Coleman.

"Mae e wedi dechrau'n dda. Gyda chwaraewyr ifanc, dwi ddim yn hoffi dweud.

"Mae George Williams a Jon Williams yn enghreifftiau da, maen nhw'n dal yn ifanc â llawer o bêl-droed i'w chwarae."

Wedi'r gêm, dywedodd Woodburn fod sgorio yn ei gêm gynta'n "gwireddu breuddwyd" iddo.

"Mae'r rheolwr a'r chwaraewyr wedi bod yn wych. Maen nhw wedi fy helpu i a fy nhrin i fel un ohonyn nhw, felly mae hi wedi bod yn hawdd bondio efo pawb."

Dywedodd dirprwy reolwr Cymru, Osian Roberts nad oedd perfformiad Ben Woodburn wedi ei synnu o gwbl: "Clod mawr i Ben, mae o'n hogyn ifanc arbennig iawn, mae o wedi bod efo ni ers blynyddoedd, da ni'n falch iawn ohono fo.

"A dyna sy'n bwysig, bod gynnon ni'r genhedlaeth ifanc o chwaraewyr sydd yn dod drwadd i atgyfnerthu beth sy gynnon ni fel grŵp sbesial iawn o chwaraewyr."

Un arall oedd yn hael ei ganmoliaeth o Ben Woodburn oedd Ian Rush:"Dwi wedi bod yn gweithio gyda Ben ers pan oedd yn 14 oed ac mae ganddo agwedd wych, mae'n cadw ei draed ar y ddaear.

"Dwi'n gwybod fod Lloegr wedi bod ar ei ôl am rai blynyddoedd, fe allai fod chwarae dros Loegr ond roedd e mor angerddol ei fod yn Gymro.

"Drwy chwarae gydag Aaron Ramsey a Gareth Bale a'u tebyg, dwi'n credu ei fod e nawr yn sylweddoli sut fyd yw hyn."

Fe fydd Ben Woodburn nawr yn teithio gyda charfan Cymru ar gyfer y gêm nesaf yng ngemau rhagbrofol grŵp D ym Moldofa nos Fawrth 5 Medi.