Carcharu dyn 23 oed am ymosodiad yng Nghaernarfon

Mae dyn wedi cael ei garcharu yn dilyn ymosodiad "ciaidd" yng nghanol tref Caernarfon.

Fe gafodd tystiolaeth fideo CCTV ei ddangos yn Llys y Goron yr Wyddgrug ddydd Llun yn dangos Dion Lloyd Gordon Jones yn rhedeg o gwmpas y lle yn "chwilio am drafferth" ar y noson dan sylw.

Roedd Jones, 23 oed, o Gwen y Llan, Caernarfon, ar fin mynd ar brawf am glwyfo dyn arall, ond fe gyfaddefodd i gyhuddiad o ymosodiad gan achosi niwed corfforol cyn i'r achos ddechrau, a chafodd ei garcharu am 21 mis.

Dywedodd y Barnwr Niclas Parry fod pobl Caernarfon "wedi cael digon" ar achosion parhaus o drais ar y stryd yn difetha eu tref.

Fe ddaeth i'r amlwg yn y llys fod gan Jones euogfarnau blaenorol am golli ei dymer tra'i fod dan ddylanwad alcohol a chyffuriau.

Dywedodd y barnwr fod ganddo 14 o euogfarnau am droseddau tebyg er mai dim ond 23 oed oedd o.

Clywodd y llys fod Jones wedi mynd ati ar Faes Caernarfon yn ystod oriau mân 17 Rhagfyr y llynedd i daro'r dioddefwr, Jonathan Adrian Cyster, yn anymwybodol.

Roedd Mr Cyster wedi dioddef anaf difrifol i'w benglog, ac wedi torri ei ên mewn dau le.

Fe gyfaddefodd Jones ei fod dan ddylanwad alcohol a chocên ar y pryd.

Nid yw Mr Cyster yn cofio beth ddigwyddodd, gan ei fod wedi mynd yn "anymwybodol am tua 20 eiliad,"meddai.

Cafodd ei gludo i Ysbyty Gwynedd lle'r oedd pryder y gallai fod wedi dioddef gwaedlif ar yr ymennydd, er i brofion wedyn ddangos nad oedd hynny wedi digwydd.

Fe wellodd o'i anafiadau, ond dri mis yn ddiweddarach roedd yn dal i gael poen, ac yn dioddef o straen, gan ei orfodi i symud i ffwrdd i fyw at ei fam.

Fe gyflwynodd y Barnwr Parry orchymyn atal pum mlynedd yn rhwystro Jones rhag cysylltu â'r dioddefwr mewn unrhyw fodd.