Uwch Gynghrair: Abertawe 2-0 Huddersfield
- Cyhoeddwyd
Mae Tammy Abraham bellach wedi sgorio pedair gôl dros Abertawe yn yr Uwch Gynghrair ers ymuno ar fenthyg o Chelsea
Mae Abertawe wedi codi i'r 13eg safle yn yr Uwch Gynghrair ar ôl trechu Huddersfield gartref diolch i ddwy gôl gan Tammy Abraham.
Toc cyn yr egwyl fe sgoriodd Abraham ei gôl gyntaf o'r prynhawn, wrth i gamgymeriad gan golwr Huddersfield Jonas Lössl roi cyfle i Tom Carroll fwydo'r ymosodwr.
Tri munud wedi dechrau'r ail hanner roedd wrthi eto, gan brocio'i ail i gefn y rhwyd yn dilyn ergyd Jordan Ayew.
Cafodd gyfleoedd i gwblhau'r hat-tric, ond fe fethodd gyfle yn gyntaf o groesiad Luciano Narsingh ac yna o bêl Nathan Dyer, ddaeth ymlaen fel eilydd yn dilyn wyth mis allan ag anaf.
Roedd hynny'n ddigon fodd bynnag i sicrhau buddugoliaeth gyntaf yr Elyrch yn y gynghrair ers mis Awst, a'u cyntaf yn Stadiwm Liberty y tymor hwn.
