Uwch Gynghrair: Abertawe 0-0 Bournemouth

Abertawe yn dod a rhediad o golli pedair gêm yn olynol i ben wrth iddyn nhw sicrhau pwynt gartref yn erbyn Bournemouth mewn gêm di-sgôr ar Stadiwm Liberty.

Fe ddechreuodd y gêm gyda thempo uchel gyda Bournemouth yn edrych yn beryglus wrth ymosod.

Fe wnaeth Jordan Ayew daro'r trawst i'r Elyrch wedi 2 funud o'r gêm ond roedd Bournemouth yn parhau i roi amddiffyn Abertawe dan bwysau wrth iddyn nhw edrych am y gôl agoriadol.

Roedd rhaid disgwyl tan bum munud cyn yr egwyl i weld ergyd am gôl gyda Fabianski yn arbed ergyd gan Josh King.

Roedd y bêl yng nghefn y rhwyd ac Abertawe yn credu eu bod wedi mynd ar y blaen cyn i'r dyfarnwr wrthod gôl Wilfred Bony oherwydd trosedd gan Ayew ar Josh King.

Roedd rhwystredigaeth y tîm cartref yn amlwg ar yr egwyl wrth i rai o'r chwaraewyr amgylchynu o gwmpas y dyfarnwr Stuart Attwell i brotestio yn erbyn ei benderfyniad.

Fe ddechreuodd Abertawe'r ail hanner yn llawer gwell na'r hanner cyntaf drwy greu problemau i amddiffyn Bournemouth.

A'r Elyrch oedd yn rheoli'r meddiant wrth i Bony a Sanchez gyd weithio'n effeithiol.

Daeth Leroy Fer i'r maes yn lle Renato Sanchez wedi 70 munud a daeth cyfle gorau'r gêm wrth i'r eilydd orfodi arbediad gwych gan Begovic yn y gôl i Bournemouth cyn methu ar yr ail gyfle.

Roedd cefnogwyr Abertawe eto yn gweiddi ar y dyfarnwr yn yr amser ychwanegol, y tro hwn Tammy Abraham aeth lawr yn y cwrt cosbi a chwaraewyr Abertawe yn credu y dylai nhw fod wedi cael cic o'r smotyn.

Daeth y gêm i ben gydag Abertawe'n rhwystredig na lwyddodd nhw i sgorio yn yr ail hanner wedi perfformiad calonogol gan yr Elyrch.