Pro 14: Southern Kings 30-34 Scarlets
- Cyhoeddwyd
Steff Hughes yn mynd amdani!
Sicrhaodd y Scarlets fuddugoliaeth ddramatig yn ngêm gyntaf eu taith i Dde Affrica yn y Pro 14 a hynny yn erbyn y Southern Kings.
Roedd hi'n gêm lle roedd y naill dîm a'r llall yn gwthio ar y blaen a phedwar cais i'r naill ochr a'r llall.
Cicio cywir Dan Jones sicrhaodd y fuddugoliaeth wrthiddo sicrhau dwy gic gosb a phedwar trosiad.
Roedd cicio Southern Kings fymryn yn llai cywir wrth i Zono lwyddo gyda dwy gic gosb ac un trosiad ac roedd yna un trosiad arall gan Coleman.
Roedd hi'n gêm lle roedd y dyrfa ar flaen eu sedd gydag wyth cais yn cynhyrfu stadiwm Nelson Mandela.
Daeth trosgais cyntaf y Scarlets ar ôl cyn lleied â phum munud trwy chwarae Tadhg Beirne.
Ymhen pum munud roedd y Kings wedi ateb gyda chais gan Makase ac ymhen pum munud arall wedi mynd ar y blaen gyda chais drwy chwarae mentrus Yaw Penxe.
Ond methwyd y trosiadau ar y ddwy. Drwy giciau cosb roedd y sgôr yn 16-10 i'r tîm cartref erbyn hanner amser.
Dechreuodd y Kings yr ail hanner yn hyderus gyda saith pwynt ychwanegol drwy gais Martin Du Toit a throed Oliver Zono.
Y Scarlets ddim yn ildio
Ond ymhen deg munud o'r ail hanner roedd y Scarlets wedi deffro ac wedi sgorio 14 pwynt drwy ddau gais - un gan Ioan Nicholas a'i goesau chwim ac yna un arall gan Werner Kruger.
Anelodd Dan Jones yn gywir ddwywaith ac wedi cic gosb arall roedd y Scarlets ar y blaen 23-27.
Yna cipiodd y Kings y flaenoriaeth eto gyda throsgais gan Klaasen gan ddod â'r sgôr i 30-27.
Ond nid oedd y Scarlets am ildio.
Bum munud yn ddiweddarach drwy waith caled Dan Jones cipiwyd trosgais arall i'r Scarlets ac fe sicrhawyd buddugoliaeth ddramatig i'r tîm o Lanelli.
Mae'r Scarlets felly yn parhau ar ben eu hadran hwy o'r Pro 14.
