Llofruddiaeth Tredegar Newydd: Un diffynnydd yn ddieuog

Mae Mr Evesham, chwith, Mr Harley, canol, a Mr Osborne, dde, yn gwadu llofruddiaethELIZABETH COOK

Mae Mr Evesham, chwith, yn dal i wynebu cyhuddiad o wyrdroi cwrs cyfiawnder

Mae un o'r tri diffynnydd yn achos llofruddiaeth David Gaut wedi ei gael yn ddieuog o'i lofruddio ar gyfarwyddyd barnwr yr achos.

Dywedodd Mr Justice Lewis wrth y rheithgor yn Llys y Goron Casnewydd i gael Darran Evesham, 47, yn ddieuog gan fod yna ddiffyg tystiolaeth.

Mae Mr Evesham, un o gymdogion Mr Gaut yn Nhredegar Newydd, yn dal i wynebu cyhuddiad o wyrdroi cwrs cyfiawnder ac yn gwadu helpu symud ei gorff.

Mae dau gymydog arall, Ieuan Harley, 23, a David Osborne, 51, yn gwadu trywanu Mr Gaut i farwolaeth yn ei fflat fis Awst y llynedd.

Mae Mr Harley, sydd heb gartref sefydlog, yn gwadu gwyrdroi cwrs cyfiawnder, ond mae Mr Osborne wedi pledio'n euog i'r cyhuddiad hwnnw.

Roedd Mr Gaut wedi treulio 32 o flynyddoedd yn y carchar am lofruddio plentyn yn yr 1980au cyn cael ei ryddhau a symud i fyw yn Nhredegar Newydd.

Clywodd y rheithgor wrth i Mr Osborne ddechrau rhoi tystiolaeth bod ganddo broblemau gyda'i gof ac wrth gyfathrebu, a bod canolwr arbenigol wrth law i'w helpu.

Mae'r achos yn parhau.