Diwrnod y cadeirio yn Eisteddfod Sir Conwy 2018

Seremoni'r cadeirio yw'r brif ddefod ar lwyfan y pafiliwn yn Eisteddfod Genedlaethol Sir Conwy ddydd Gwener.

Mae saith o awdlau wedi eu cyflwyno i feirniaid y gystadleuaeth, sy'n cynnwys yr Archdderwydd newydd, Myrddin ap Dafydd.

Un o'r uchafbwyntiau eraill ar y maes yn Llanrwst fydd y seremoni i dderbyn aelodau newydd i Orsedd y Beirdd, gan gynnwys y delynores Catrin Finch a'r digrifwr, Tudur Owen.

Ond gyda rhybudd melyn y Swyddfa Dywydd am law trwm mewn grym ar draws Cymru tan hanner nos, fe allai'r trefnwyr orfod cynnal y ddefod yn y Neuadd Ddawns yn hytrach nag yn yr awyr agored.

Roedd gofyn i ymgeiswyr am y gadair lunio awdl neu gasgliad o gerddi mewn cynghanedd, heb fod dros 250 o linellau, ar y testun Gorwelion.

Llion Jones ac Ieuan Wyn yw'r ddau feirniad arall.

Gwenan Hâf Jones o Bentrefoelas sydd wedi dylunio a chreu'r gadair eleni, sy'n cael ei rhoi gan undeb Amaethwyr Cymru.

Os fydd yna deilyngdod, bydd y bardd buddugol hefyd yn cael £750, sy'n rhodd er cof am y Prifardd Gwynfor ab Ifor gan ei deulu.

Gruffudd Eifion Owen ddaeth i'r brig yn y gystadleuaeth yn Eisteddfod Genedlaethol Caerdydd 2018.

Bydd yr Orsedd yn derbyn dros 30 o aelodau newydd mewn seremoni ar y maes fore Gwener.

Bydd Catrin Finch yn cael gwisg werdd, yn ogystal â'r cerddor a'r bardd, Geraint Løvgreen, y newyddiadurwr, Bethan Kilfoil, a John Jones ac Alun Roberts - sy'n fwy adnabyddus fel y ddeuawd, John ac Alun.

Mae Tudur Owen yn cael gwisg las, ynghyd ag un arall o gyflwynwyr Radio Cymru, y gwerthwr ceir Gari Wyn.