Cymru 1-1 Gweriniaeth Tsiec

Sicrhaodd dîm ifanc Cymru gêm gyfartal mewn achlysur fydd yn cael ei chofio'n bennaf am 100fed cap Wayne Hennessey.

Cyn y gêm gyfeillgar fe gyflwynwyd y golwr o Fôn gyda thlws i nodi'r gamp gan un o'i arwyr, Neville Southall.

Roedd y Weriniaeth Tsiec yn dominyddu'r meddiant yn ystod yr hanner cyntaf gyda dau gyfle yn syrthio i Jan Kuchta o fewn y chwarter awr agoriadol.

Gwobrwywyd goruchafiaeth y Tsieciaid ar ôl 32 munud wedi i Soucek fanteisio ar bêl lac yn y cwrt cosbi.

Ond roedd Cymru'n gyfartal o fewn dau funud, diolch i symudiad ddechreuodd gyda phas hir Chris Gunter.

Gyda hwnnw'n darganfod Brennan Johnson, llwyddodd chwaraewyr Nottingham Forest i basio'i ddyn a thynnu'r bêl yn ôl i Rubin Colwill, gyda'i ergyd clyfar yn diweddu yng nghornel isa'r rhwyd.

Roedd Ondrej Lingr yn credu ei fod wedi rhoi'r Tsieciaid ar y blaen yn fuan wedi'r egwyl, ond roedd o'n camsefyll.

Crëwyd mwy o gyfleon gan Gymru yn yr ail hanner, gyda Johnson yn serennu yn y llinell flaen.

Yn ôl y disgwyl mewn gêm gyfeillgar, fe wnaed sawl newid wedi awr o chwarae, gyda Adam Davies yn dod ymlaen am Wayne Hennessey i gymeradwyaeth y dorf o dros 12,000 yn Stadiwm Dinas Caerdydd.

Bu bron i Bale, wedi dod i'r maes gyda 10 munud yn weddill, sicrhau buddugoliaeth ond arbedwyd ei ergyd o ongl dynn gan Tomas Vaclik.