'Profiad gwefreiddiol' enillydd Medal Daniel Owen

Meinir Pierce Jones yw enillydd Gwobr Goffa Daniel Owen yn Eisteddfod Genedlaethol Ceredigion 2022.

Derbyniodd yr awdur o Nefyn, Llŷn yr anrhydedd am ei nofel 'Capten' mewn seremoni ar lwyfan y Pafiliwn yn Nhregaron brynhawn Mawrth.

Roedd 14 wedi ymgeisio eleni i greu nofel heb ei chyhoeddi gyda llinyn storïol cryf, heb fod yn llai na 50,000 o eiriau.

Y wobr yw Medal Goffa Daniel Owen, yn rhoddedig gan Gareth, Cerys a Betsan Lloyd, Talgarreg - a £5,000 gan Brifysgol Aberystwyth.

Dywedodd un o'r tri beirniad, yr awdur Manon Steffan Ros, fod "y safon yn gyffredinol yn uchel iawn eleni" er nad oedd y tri yn gytûn ar yr enillydd.