Ymgais AS o Gymru i fod yn Faer Llundain yn methu

Mae Aelod o Senedd Cymru wedi methu yn ei hymgais i gael ei dewis fel ymgeisydd y Ceidwadwyr ar gyfer etholiad Maer Llundain.

Fe gyhoeddodd Natasha Asghar, AS Dwyrain De Cymru, dair wythnos yn ôl ei bod hi'n bwriadu ymgeisio, gan ychwanegu y byddai hi'n "chwa o awyr iach" i'r ddinas.

Cafodd y bwriad hwnnw ei groesawu gan rai a'i feirniadu gan eraill, gydag hyd yn oed rhai o fewn ei phlaid yn mynegi syndod am y cyhoeddiad.

Ond mae'r Ceidwadwyr nawr wedi dewis tri ymgeisydd ar gyfer eu rhestr fer - a dyw Ms Asghar ddim yn eu plith.

Y tri ymgeisydd ar restr fer y Ceidwadwyr fydd Susan Hall, aelod o Gynulliad Llundain, Daniel Korski, sy'n gyn-ymgynghorydd yn Downing Street, a'r bargyfreithiwr Mozammel Hossain.

Mae'n golygu bod yr Aelod Seneddol Paul Scully, sy'n weinidog yn Llywodraeth y DU, hefyd ymhlith y rheiny sydd wedi bod yn aflwyddiannus.

Cafodd y rhestr fer ei llunio yn dilyn cyfweliadau gan banel ym mhencadlys y Ceidwadwyr, a bydd yr enillydd yn cael ei gyhoeddi fis nesaf yn dilyn pleidlais ymhlith aelodau'r blaid.

Fe fydd yr ymgeisydd terfynol wedyn ymhlith y rhai fydd yn herio'r maer presennol Llafur, Sadiq Khan, fis Mai nesaf.

Cafodd Ms Asghar ei hethol i'r Senedd ym Medi 2021, a bellach mae'n llefarydd dros ei phlaid ar drafnidiaeth yng Nghymru.

Wrth gyhoeddi ei bwriad i sefyll, dywedodd ei bod hi wedi byw yn Llundain "am yr un nifer o flynyddoedd ag yr rydw i wedi byw yng Nghymru".

Ychwanegodd mewn datganiad fod ei phenderfyniad wedi dod yn dilyn "llawer o berswâd gan drigolion ledled Llundain".

Ar ôl dwy flynedd yn "ymladd yn erbyn polisïau Llafur yng Nghymru", dywedodd Ms Asghar ei bod yn "barod i fynd â'r frwydr i Lundain".