ICC yahagaritse urubanza ruregwamo William Ruto
Ahavuye isanamu, Reuters
Urukiko mpuzamahanga mpanabyaha-ICC-rutegetse ko urubanza visi perezida wa Kenya William Ruto aregwamo ibyaha byibasira inyoko muntu ruhagarikwa.
Bwana Ruto aregwa ibyaha byo kwica, kwimura abantu ku gahato,no gushyira abantu ku ngohi, byakozwe nyuma y'amatora yo muri 2007.
Yakomeje guhakana ibyaha yaregwaga, abamwunganira mu rukiko basabaga urwo rubanza ruteshwa agaciro kubera ko rudafite ibimenyetso.
Imvururu zabaye muri Kenya nyuma ya'amatora yo muri 2007 zahitanye abantu 1,200.
Urukiko rwavuze ko habaye kwinjira muri uru rubanza kw'abanyepolitike muri Kenya. Ruvuga ko abatangabuhamya bamwe bishwe abandi bagahindura ubuhamya bwabo.
Uru rukiko rwavuze ko igihe cyose hazaboneka ibimenyetso bishya uru rubanza ruzasubukurwa.
