Burundi: Cathy Kezimana washobora gutorwa nka depite yari afungiye mu Mpimba
Ahavuye isanamu, Cathy Kezimana
Cathy Kezimana wiyamamazaga ku mwanya w'umushingamateka ku ishyaka CNL yafashwe hagati mu bikorwa byo kwiyamamaza arafungwa, yafunguwe by'agateganyo ejo kuwa gatatu, we abona icyari kigamijwe ari ukumuvana mu biyamamaza.
Ishyaka CN abamo rivuga ko abantu baryo barenga 300 bafunzwe muri iki gihe cy'amatora kubera ibitekerezo no guhitamo kwabo kwa politiki.
Mu bikorwa byo kwiyamamaza, minisiteri y'umutekano mu Burundi yashinje bamwe mu ba-CNL amagambo ahamagarira urugomo, gutukana, ubwicanyi no kugirira nabi abo mu ishyaka CNDD-FDD.
Cathy Kezimana uzwi kandi ku izina rya Citoyenne, yabwiye BBC ko nawe yarezwe gutukana.
Yafashwe gute?
Ku mugoroba wa tariki 05 z'uku kwezi yari avuye kwiyamamaza muri komine Mugongomanga, uwo mugoroba yaraye muri gereza nkuru ya Mpimba.
Madamu kezimana ati: "Nari ntwaye imodoka nsanga abapolisi bantegeye mu ibarabara, banyereka manda yo kumfata bamvana mu modoka banshyira mu modoka yabo banjyana kuri parquet.
"Banyeretse amagambo navuze ndi muri 'meeting' muri komine yacu, bambwira ko natukanye, ndisobanura. Hanyuma barambwira ngo ntegereze gato bavugane n'abandi bantu, nyuma bantwara mu Mpimba".
Ahavuye isanamu, CNL
Madamu Kezimana yabwiye BBC ko hari amashusho yafashwe agaragaza ibyo yavuze byose, ko we abona nta kintu kibi yavuze kandi nta kintu kibi yahamagariye abantu gukora.
Ati: "Nibaza ko bifuzaga ko mva kuri liste y'abiyamamaza, bankuyeho, ariko nta kibazo, ntakundi".
Aracyafunze mu mutima
Aho yari afungiye avuga ko hari abantu benshi bo muri CNL bazanye kuhafungira muri ibi bihe by'amatora.
Ati: "Ni benshi cyane b'aba CNL, abagore ni benshi abagabo bo ni benshi cyane kandi niho bakiri".
"Benshi ni abantu batoya b'abarimyi, badafite n'ababavugira badashoboye kubona ubaburanira, nta kintu na kimwe bafite, ni ibintu bibabaje gusa.
"Niyo mpamvu mvuga nti ndafunguwe ariko ndacyafunze mu mutima wanjye kuko ndatekereza abo bose bafunzwe nta ubavugira, ni amarira gusa".
Madamu Kezimana ubu abujijwe gukora politiki yose, kandi buri kuwa mbere agomba kwitaba urukiko rwo mu Kabezi mu ntara ya Bujumbura.
