Nkurunziza: Yijeje imyaka itanu y'amahoro

Perezida w’u Burundi, Pierre Nkurunziza, avuga ko azatanga imyaka itanu y’amahoro niyongera gutorwa, mu matora atavugwaho rumwe ateganyijwe ku wa kabiri.

Igihe yavugiraga mu bikorwa byo kwiyamamaza, yamwaje abatavuga rumwe nawe bateguye ibyumweu bitatu by’imyigaragambyo, kubera icyemezo cye cyo kwiyamamariza gutegeka ku nshuro ya gatatu.

Hacuranzwe indirimbo zimwaza abateguye ihirika ry’ubutegetsi ryapfubye. Ku wa kane, abantu babiri barakomeretse igihe igipolisi yarasaga ku bashyigikiye abatavuga rumwe na Leta mu murwa mukuru Bujumbura. Abantu barenga 70 barishwe kuva imyivumbagatanyo yatangira mu kwezi kwa kane.

Ishyaka rya UPRONA rya Gerard Nduwayo, ryakoreye ibikorwa byaryo byo kwiyamamaza mu Majyepfo y’u Burundi ahitwa i Nyanzalac. Abo mu ishyaka FNL, n’abo muri COPA ntibiyamamaje.

Ibiganiro birakomeza

Hagati aho ibiganiro bigamije kubonera umuti ikibazo cya politiki kiri mu Burundi gishingiye ku matora byatangiye ku wa kane birakomeje.

Bihagarariwe na ministri w'ingabo wa Uganda, Crispus Kiyonga - nawe akaba ari intumwa y'umuhuza, Perezida wa Uganda Yoweri Museveni.

Yagenwe n'umuryango w'ibihugu bya Afurika y'uburasirazuba nyuma y'amakimbirane yadutse kuva aho Perezida Pierre Nkurunziza atangarije ko aziyamamariza kuyobora igihugu ku nshuro ya gatatu.