Leta y'Uburundi yasobanuye icyatumye ititaba ibiganiro

Leta y'Uburundi ivuga ko impamvu y'ingenzi yatumye ititaba ibiganiro ku cyumweru ari uko kuri uwo munsi hari hateganijwe amatora y'abayobozi b'amakomine mu gihugu hose.

Ministri w'ububanyi n'amahanga w'Uburundi, Alain Nyamitwe, yabwiye BBC ko kubera izo mpamvu ministri w'ubutegetsi bw'igihugu wari uhagarariye leta ntabwo yashoboraga kuza muri ibyo biganiro ku cyumweru.

Ngo kubera iyo mpamvu kandi ishyaka riri ku butegetsi rya CNDD-FDD ndetse n'andi mashyaka ari mu matora ntiyashoboraga kubyitabira kuri uwo munsi.

Indi mpamvu leta itanga n'urwandiko rw'amashyaka amwe n'amwe atavuga rumwe na leta ruvuga ko agiye gushinga inama y'igihugu bise iyo kurengera amasezerano ya Arusha n'itegeko nshinga.

Leta ivuga ko muri urwo rwandiko ngo harimo amagambo yerekana ko abarwanditse basa badafite umugambi wo kuganira kugirango umwumvikano ku bibazo bimwe na bimwe uboneka.

Abatavuga rumwe na leta bavuga ko ayo ngo ari amayeri leta yazanye igihe bari bageze aho kuganira ku kibazo cy'amatora na manda y'umukuru w'igihugu.

Jean Minani wo muri Sahwanya Frodebu nyakuri, yabwiye BBC ko urwo ari urwitwazo rwa leta ngo kubera ko urwo rwandiko rwari rumaze icyumweru ruriho.