Biden arashakira imfashanyo 'kamara' Isiraheli na Ukraine mu ntambara birimo
Ahavuye isanamu, Getty Images
- Umwanditsi, Holly Honderich & Sarah Smith
- Igikorwa, BBC News, Washington
- Yatangajwe
Perezida wa Leta Zunze Ubumwe za Amerika, Joe Biden, yatangaje ko amateka y'isi arimo kwerekeza "ahakomeye" ubwo yasabiraga Ukraine na Isiraheli imfashanyo ingana na miliyari nyinshi z'amadolari yo ku bifasha mu ntambara birimo.
Mu ijambo yavugiye mu biro bye bya White House, yavuze ko Hamas n'Uburusiya byombi byifuza "kurimbura demokarasi bituranye".
Bwana Biden yavuze ko kuri uyu wa gatanu aza gusaba intekonshingamategeko y'igihugu cye kwemeza inkunga yihutirwa bivugwa ko iza kuba ibarirwa kuri miliyari 105 z'amadolari.
Ariko ubu intekonshingamateko nta mukuru wayo ifite, bisobanuye ko idashobora kwemeza iyo nkunga.
Iri jambo arivuze nyuma y'umunsi umwe agiriye uruzinduko rwateguwe hutihuti muri Isiraheli nyuma y'ibitero bya Hamas ku ya 7 Ukwakira (10).
Bwana Biden yavuze ko iyi nkunga yihutirwa arimo gusaba 'izazanira inyungu abanyamerika mu bijyanye n'umutekano mu bisekuru byinshi biri imbere'.
Mu ijambo rye ryamaze iminota 15, yamaganye kandi buri gikorwa cyose cy'urwango rukorewe abayahudi cyangwa se abayisilamu muri Amerika, kandi yamagana urupfu rw'umwana w'umunyamerika ufite inkomoko y'abanyapalestina w'imyaka itandatu - Wadea al-Fayoume - wishwe atewe icyuma i Chicago muri kino cyumweru.
Ati: "Tugomba kutavangura mu gihe twamagana kurwanya abayahudi". "Tugomba kandi kutavangura mu gihe twamagana urwango ku bayisilamu."
White House ntiratanga ku mugaragaro ibisobanuro birambuye ku bikubiye muri iyo nkunga iteganijwe.
Ariko umuntu ufite amakuru yizewe yabwiye igitangazamakuru CBS cyo muri Amerika gikorana na BBC ko muri iyo nkunga harimo:
- Miliyari $60 zigenewe Ukraine no gusimbura intwaro Amerika yatanze.
- Miliyari $14 zigenewe Isiraheli
- Miliyari $10 zigenewe ibikorwa by'ubutabazi
- Miliyari $7 zigenewe akarere ko mu nyanja y'Ubuhinde na Pacific, harimo na Taiwan
- Miliyari $14 zigenewe umutekano ku mipaka ya Amerika
Bwana Biden kandi yanaboneyeho maze ashimangira impuhwe atewe n’imibabaro y’abanyapalestina muri Gaza, ndetse anavuga ko yahuye n’imiryango y’abanyaisiraheli n'abanyamerika bazize ibitero bya Hamas.
Abo mu ishyaka ry'abademokarate bafite ikizere ko guhuriza hamwe izi mfashanyo bishobora gutuma kubonera inkunga Ukraine bitagorana, kubera ko bamwe mu bo mu ishyaka ry'aba Republicans batayishyigikiye.
Gusa ubu busabe buje mu gihe inteko nshingamategeko nta mukuru wayo ifite kubera ko kumutora byananiranye nyuma yaho Kevin McCarthy avaniwe kuri uwo mwanya n'abadepite bagendera ku murongo ukaze w'iburyo muri politiki hashize ibyumweru bibiri.
Bwana Biden, wo mu ishyaka ry'abademokarate, ntabwo yagarutse ku buryo bweruye kuri icyo kibazo cya politiki kiri mu nteko, ariko yiyemereye ko harimo ubwumvikane buke.
Ati: "Tuzabonera umuti icyo kibazo. Ntitugomba kureka politiki y'uburakari n'inyungu bwite za bamwe ngo yitambike imbere y'inshingano dufite nk'igihugu gikomeye.
"Ntidushobora kandi ntituzemera ko abakora iterabwoba nka Hamas n'abategetsi b'igitugu nka Putin batsinda. Nanze ko ibyo bibaho."
Ariko uko ibintu bimeze ubu ntawe uzi niba ubu busabe bwa Biden buzemerwa n'intekonshingamategeko nubwo yaba imaze kubona umuyobozi.
