Arhar kayan masarufi ka iya jefa tattalin arzikin duniya halin ka ka ni kayi — IMF

Asusun lamuni na duniya, IMF, ya yi gargadin cewa akwai yiwuwar bunkasar tattalin arzikin duniya ya ja da baya, sanadiyyar arhar kayayyakin masarufi da kuma rikice-rikicen siyasa.

A wani rahoto da aka saki a taron IMF da bankin duniya na shekara-shekara, asusun IMF, ya ce tattalin arzikin duniya bai kammala murmurewa ba, kuma a kasashe da dama bunkasar tattalin arzikin ba ta yi karfi ba.

Koda yake, asusun ya amince da cewar an samu karuwar hada-hadar harkokin tattalin arziki sanadiyyar karuwar zuba-jari da cinikayya da kuma samar da kayyayakin masana'antu, amma duk da haka ya yi gargadin cewa mutane da yawa a fadin duniya ba su ji wani sauyi a rayuwarsu ba.