An yi jana'izar jakadan Rasha da aka kashe a Turkiya

Karanta rubutu kawai domin rage cin data
Mr Putin na cikin mutanen da suka sanya fure a kan kawatin gawar Karlov

Asalin hoton, Reuters

Bayanan hoto, Mr Putin na cikin mutanen da suka sanya fure a kan kawatin gawar Karlov
An wallafa

Ana yin jana'izar jakadan Rasha wanda aka harbe har lahira a Ankara, babban birnin kasar Turkiyya.

A ranar Talata ne aka kai gawar Mr Andrei Karlov, wanda wani dan sanda Mevlut Mert Altintas birnin Moscow domin yi masa jana'iza.

Shugaba Vladimir Putin zai yi jawabi a wajen jana'izar da ke ma'aikatar harkokin wajen kasar.

Bayan ya harbe jakadan, Mr Altintas ya rika ihu yana cewa ya dauki matakin ne a matsayin ramuwar-gayya kan shigar kasar Rasha cikin hare-haren da ake kai wa a Aleppo na Syria.

Ana fargabar cewa kisan jakadan na Rasha a Turkiyya zai sa dangantaka tsakanin kasashen biyu ta yi tsami, kodayake wakiliyar BBC a Moscow Sarah Rainsford ta ce kasashen sun jaddada abokantakar da ke tsakaninsu.

Rasha da Turkiyya na aiki tare a kan binciken kisan da ake yi.

Andrei Karlov yana yin jawabi ranar Litinin ba tare da sanin cewa mutumin da ke bayansa ne zai kashe shi ba

Asalin hoton, AP

Bayanan hoto, Andrei Karlov yana yin jawabi ranar Litinin ba tare da sanin cewa mutumin da ke bayansa ne zai kashe shi ba

Karlov, mai shekara 62, fitaccen ma'aikacin dipilomasiyya ne wanda ya yi aiki a kasashe da dama ciki har da jakadan Tsohuwar Tarayyar Sobiyat a Koriya ta Arewa a shekarun 1980.