Jami'an tsaro sun yi kisa fiye da Coronavirus a Najeriya
Asalin hoton, Facebook
Hukumar kare hakkin dan adam ta Najeriya ta ce jami'an tsaron kasar sun kashe akalla mutane goma sha takwas, yayin tilasta amfani da dokar hana zirga-zirga da aka kakaba a wasu jihohi don yaki da cutar korona.
Wannan adadi dai ya zarce na mutanen da cutar ta kashe a lasar baki daya, da ya tsaya a goma sha biyu.
Hukumar ta ce ta samu korafe-korafe fiye da 100 na take hakki, ciki kuwa har da wadanda tace sun shafi kisan jama'a.
A Najeriya dai hukumomi sun kakaba dokar hana zirga-zirga a manyan biranen kasar uku.
Ko da a ranar Laraba sai da wani likita ya mutu saboda kamuwa da cutar a birnin Legas.
Zuwa yanzu dai adadin mutanen da aka tabbatar suna dauke da cutar korona a Najeriya sun kai 407 kamar yadda hukumar da ke dakile cututtuka masu yaduwa a kasar NCDC ta sanar a ranar Laraba da daddare.
Tuni mutum 128 sun warke daga cutar yayin 12 kuma suka mutu.
Ya zuwa yanzu, cutar ta bulla a jihohi 19 har da babban birnin kasar.
