Jonathan zai nada mai bada shawara kan ta'addanci

Shugaban Najeriya, Dakta Goodluck Jonathan ya ce zai nada mai bada shawara na musamman kan ayyukan ta'addanci a makon gobe.

Mai baiwa shugaban shawara ta fannin yada labarai Ima Niboro ne ya bayyana hakan ga manema labarai a Abuja, bayan shugaban ya gana da jami'an tsaron kasar.

Ya kara da cewa, shugaban zai hada gwiwa da majalisar dokokin kasar da zummar ganin ta zartar da kudurin doka kan ta'addanci a kasar.

Wannan kalami na shugaban kasa na zuwa ne kwanaki kadan bayan harin bam din da aka kai a wata mashaya dake Abuja a jariberen Kirsimeti, inda kimanin mutane hudu suka rasa rayukansu.

Hare-haren bama-bamai dai sun yawaita a kasar a baya-bayan nan wadanda aka fi dangantawa da masu kishin addini da kuma masu son cimma wani buri na siyasa.