Tarayyar Afirka ta zargi Kotun Duniya

Karanta rubutu kawai domin rage cin data
Firayim Ministan Habasha Hailemariam Desalegn
Bayanan hoto, Firayim Minista Hailemariam Desalegn ya zargi Kotun Duniya da yi wa 'yan Afirka bi-ta-da-kulli
An wallafa

Kungiyar Tarayyar Afirka ta zargi Kotun Hukunta Manyan Laifuffuka da kafa wa 'yan Afirka "kahon-zuka" saboda launin fatarsu.

A cewar Firayim Ministan Habasha, Hailemariam Desalegn, kungiyar ta Tarayyar Afirka dai tana adawa da yunkurin Kotun ta Duniya na yi wa Shugaba Uhuru Kenyatta na Kenya shari'a bisa tuhumce-tuhumcen cin zarafin bil-Adama.

Ya kuma kara da cewa kungiyar za ta kai batun gaban Majalisar Dinkin Duniya.

A watan Yuli ne dai ake sa ran fara shari'ar Mista Kenyatta, wanda aka zaba a watan Maris.

Mista Kenyatta ya musanta tuhumce-tuhumcen, wadanda suka samo asali daga zarge-zargen cewa ya hura wutar rikicin da ya biyo bayan zabukan 2007 wadanda aka yi ta takaddama a kansu.

Masharhanta dai sun ce tuhumce-tuhumcen sun kara tagomashin yakin neman zaben Mista Kenyatta a zabukan bana, saboda masu kada kuri'a da dama na ganin shari'ar shisshigi ce a harkokin cikin gidan Kenya.