Kungiyar MSF za ta janye daga Sudan
Asalin hoton, msf
An wallafa
Kungiyar agajin likitoci ta Medecins Sans Frontieres ta ce za ta janye tawagarta daga Sudan saboda hukumomi a kasar suna mata katsalandan da gangan a yankunan da ake tashin hankali.
MSF ta ce gwamnatin Sudan na amfani da wasu dabaru wajen hana ta kai wa wasu yankunan da ke jihohin Darfur da kuma Blue Nile.
A jihohin dai akwai dubban mutanen da ke bukatar kayayyakin agaji.
Dakarun Sudan na yaki a yankunan da ke kan iyakar kudancin kasar domin murkushe ayyukan 'yan tawaye.
A makon da ya gabata ne MSF ta zargi dakarun sojin saman Sudan da wurga bambamai a wani asibiti da ke tsaunin Nuba.
