Boko Haram: Jama'a na cikin mawuyacin hali

Shugaban kwamitin bayar da agaji na Red Cross ya bayyana halin da jama'a suke ciki a arewa maso gabashin Nigeria, inda mayakan Boko Haram suke tayar da kayar-baya a matsayin daya daga cikin mafi muni a duniya

Bayan da ya ziyarci yankin, Peter Maurer ya ce mai yiwuwa mutane a yankin za su kasance ne cikin damuwa na lokaci mai tsawo, dangane da irin abubuwa na tashe- tashen hankula da suka gani.

Mutane kimanin miliyan daya da rabi ne suka rasa matsugunansu a 'yan shekarun nan.

Red Cross na daya daga cikin kungiyoyi 'yan kalilan dake aiki a yankin.

Ta kuma mika kokon bararta, na neman dala miliyan 65 domin gudanar da aikace-aikacenta a kasahen da wannan tashin hankali ya shafa, da suka hada da Najeriya da Chadi da Kamaru da kuma Nijar.