Najeriya ta gayyaci dan kwallo Wigan Victor Moses

Najeriya ta gayyaci dan kwallon Wigan Victor Moses cikin tawagar Super Eagles da zasu fuskanci Ethiopia a wasan share fage na neman gurbin zuwa gasar cin kofin kasashen Afrika a badi.

Mataimakin kocin Super Eagles Simon Kalika ya bayyana cewar"mun kira Moses saboda mun gudanar da sauye- sauye a tawagar da zata kara da Ethiopia a karshen mako".

Wakilin Moses, Tony Finnigan ya bayyana cewar dan kwallon Wigan din zai hade tare da sauran 'yan wasan Najeriya da kuma Victor Obinna a ranar Litinin.

A wasan sada zumuncin da Najeriya ta kara da Sierra Leone a watan daya gabata, an gayyaci Victor Moses amma kuma bai amsa gayyatar ba.

Moses mai shekaru 20, a baya ya bugawa Ingila kwallo a matakin 'yan kasada shekaru 17 da 19 da kuma 21.