Za a koma gasar kwallon Masar a karshen mako
Asalin hoton, Reuters
An wallafa
Za a koma buga kwallo a gasar Masar a karshen wannan makon, sakamakon rahotannin cewar cigaba da dakatar da gasar zai durkusar da wasu kungiyoyin.
An kara dakatar da shirin fara gasar ne saboda tashin hankalin daya auku a Alkahira lokacin gasar cin kofin zakarun Afrika.
Bayan roko daga wajen manyan kungoyoyin kasar, sai hukumar dake kula da kwallon Masar EFA ta canza shawara.
A halin za a fara gasar a ranar 13 ga watan Afrilu kuma 'yan kallo zasu hallarta.
A baya ana dakatar da gasar ce saboda yamutsin siyasa daya auku a kasar abinda ya kawo karshen mulkin Shugaban Hosni Mubarak.
Hukumar EFA ta ce Firayi Ministan kasar Esam Sharaf ya amince da batun.
