Man City ta jiyo kanshin kofin Premier

Manchester City ta sake dare mataki na daya a kan teburin gasar Premier bana, bayan da ta doke Leicester City 1-0 a ranar Litinin.

City wadda ta karbi bakuncin Leicester a wasan mako na 37 a Etihad, ta ci kwallon ne ta hannun kyaftin dinta Vincent Kompany saura minti 20 a tashi daga wasan.

Wannan ne karo na uku da kungiyoyin suka fafata a bana, inda suka fara tashi 1-1 ranar 18 ga watan Disambar 2018 a League Cup.

Haka kuma sun fafata a wasan Premier a King Power ranar 26 ga watan Disambar 2018, inda Leicester City ta yi nasara da ci 2-1.

City na shirin lashe kofi uku a kakar bana, bayan da ta ci League Cup, za ta buga wasan karshe a kofin FA, sannan tana ta daya a kan teburin Premier.

A ranar Lahadi za a karkare wasannin Premier bana, kuma da zarar City ta yi nasara a kan Brighton za a mallaka mata kofin, kuma ita ce ke rike da na bara.

Yadda teburi yake bayan karawar mako na 37

Wasannin da za a buga ranar Lahadi 12 Mayu 2019