France ta doke Spain ta zama ta biyu da ta ci Nations League

Kylian Mbappe ne ya ci wa Faransa kwallon da ta lashe Nations League, bayan doke Sifaniya a Italia ranar Lahadi.

Tawagar Faransa ta yi nasarar doke Sifaniya da ci 2-1 a wasan karshe da suka fafata a Nations League a Italiya.

Sifaniya ce ta fara cin kwallo ta hannun Mikel Oyarzabal daga baya Karim Benzema ya farke wa Faransa.

Mbappe ne ya zura na biyu a raga, bayan da ya buga ta kasan mai tsaron raga, Unai Simon ta fada a raga a fafatawar da suka yi a San Siro.

Faransa ta kawo wasan karshe, bayan da ta doke Belgium a wasan daf da karshe, ita kuwa Sifaniya ta kawo wannan matakin, bayan da ta fitar da Italia ta kuma taka mata burkin cin wasanni a jere.

Tawagar kwallon kafa ta Portugal ce ta fara lashe Nations League a kakar 2019 a aka fara gudanar da gasar.

Faransa wadda ke rike da kofin duniya da ta lashe a Rasha a 2018 na shirin zuwa gasar cin kofin duniya da za a yi Qatar a 2022.