Bayren Munich 1 - 1 Villareal: Dan Najeriya ya fitar da Bayern daga Champions League

Karanta rubutu kawai domin rage cin data
Samuel Chukwueze

Asalin hoton, Getty Images

Bayanan hoto, Kwalo biyu Chukwueze ya ci wa Villarreal a Champions League
An wallafa

Villareal ta kai karawar daf da karshe a Champions League, duk da tashi 1-1 da ta yi a gidan Bayern Munich ranar Talata.

A ranar Laraba 6 ga watan Afirilu Villareal ta ci Bayern Munich 1-0 a wasan farko da suka kara a Sifaniya a zagayen daf da na kusa da na karshe.

Robert Lewandowski ne ya fara ci wa Bayern kwallo, bayan da suka koma daga hutun rabin lokacin a Allianz Arena.

Sauran minti biyu a tashi daga wasan Samuel Chukwueze ya farke kwallon da ya kai kungiyar Sifaniya zagaye na daf da karshe a Champions League.

Da wannan sakamakon Villareal za ta fuskanci duk wadda ta yi nasara tsakanin Liverpool da Benfica da za su kece raini ranar Laraba.

Ranar Talata 5 ga watan Afirilu, Liverpool ta doke Benfica 3-1 a wasan farko zagayen kwata fainal a Portugal.

Unai Emery na fatan lashe Champions League a karin farko, bayan da ya dauki Europa League biyu a Sevilla da daya a Villareal a bara.