Blas ar godi arian

Wfft i Mary Berry a'i thebyg. Er mor bleserus yw gorweddian ar y soffa yn glafoerio wrth wylio'r Bake Off, mae 'na hefyd rywbeth boddhaol dros ben am lowcio pizza crasboeth a chawslyd yn syth o'r popty.

Ar gyfer diwrnod Plant Mewn Angen eleni, mae Cymru Fyw wedi gwahodd cogyddion ifanc i'r gegin i baratoi prydau syml ond blasus o'u dewis nhw.

Yr unig reol? Dim popty ping!

Mae'r fideos isod yn cael eu cyflwyno mewn gwhanol ieithoedd gan gynnwys Cymraeg, Roma a Iaith Arwyddo. Wrthi'n cymysgu, berwi a phobi ar eich cyfer mae:

Felly, ymlaen â'r ffedogau a thorchwch eich llewys. Ychwanegwch dalp o frwdfrydedd a llwyaid o hiwmor - a chymysgu'r cyfan i greu crochan llawn hwyl.

Dyma'r rysáit cyntaf ar eich cyfer - pizzas pitw gan Ellen, Lucy a Christian o Ganolfon Maerdy, dolen allanol.

Mae'r ganolfan ym mhentre' Tairgwaith ger Rhydaman wedi derbyn arian gan Plant Mewn Angen i gynnal sesiynau hybu iechyd ar gyfer pobl ifanc lleol. Pob nos Iau mae 'na gyfle i gadw'n heini, i dderbyn cyngor am fwyta'n iach - ac i ymarfer sgiliau coginio.

Dyma'r unig glwb ieuenctid yn yr ardal ac mae rhai bobl ifanc yn cerdded 20 munud i gyrraedd yna.

Mae Cwmni Diwylliannol a Chelfyddydol Romani, dolen allanol yn cynnal gweithdai ar gyfer plant o dras Sipsi a Theithwyr Gwyddelig. Mae Miroslav, Lara, Slavo a Jessica yn byw yn ardal Casnewydd ond yn hanu o Slofacia. Maen nhw'n siarad Romanës neu Rromani-chib, sef iaith pobl Romani ledled y byd.

Yma mae nhw'n paratoi rysáit traddodiadol, sef bisgedi ar gyfer y Nadolig.

Rysáit traddodiadol sydd gan gogyddion ifanc Fferm Gymunedol Abertawe, dolen allanol hefyd, sef cawl.

Yn ogystal â thorri, cymysgu a choginio'r llysiau a pherlysiau, nhw hefyd sydd yn gyfrifol am blannu a thyfu'r cynhwysion i gyd. Mae'r gweithgareddau ar y fferm yn rhoi cyfle i bobl ifanc fagu hyder a meithrin sgiliau newydd.

Un sydd wedi elwa'n fawr yw Tarri, 13 oed, a symudodd o Lundain i Abertawe bedair mlynedd yn ôl. Mae gan Tarri Syndrom Asperger sy'n gwneud cymdeithasu'n anodd. Ond erbyn heddiw, mae'n siarad Cymraeg yn hyderus ac wedi gwneud llu o ffrindiau newydd. Ymysg rheiny mae Danny, Jordon-Leigh, Chelsea, Luana, Tyler, Keira ac April sy'n helpu Tarri yn y gegin.

Mae Jay yn aelod poblogaidd o glwb ieuenctid Talking Hands sy'n cynnal sesiynau yng Nghanolfan Byddar Abertawe., dolen allanol Mae'n giamster yn y gegin - ond ei freuddwyd yw bod yn gerddor. Mae Jay yn defnyddio iaith arwyddo i esbonio sut i baratoi wrap blasus.

Sglodion sbeisi sydd ar fwydlen Shakira a Chloe yng nghegin Clwb Ieuenctid Fernhill. Mae'r ganolfan, ger Aberpennar yng Nghwm Cynon, yn cynnig lle diogel a chlud i bobl ifanc gymdeithasu a mwynhau gyda ffrindiau yn ogystal â dysgu sgiliau newydd a magu hyder. Mae'r ddwy yn gogyddion brwd ac yn mwynhau profi ryseitiau newydd.

Mwynhewch!